మొగలి పూలూ -ఇందిరా పార్కూ

చాలా రోజుల తర్వాత ఈవేళ సాయంత్రం నేనూ గీత కలిసి ఇందిరా పార్క్ కి వెళ్ళేం.ఓ నాలుగైదేళ్ళ క్రితం రోజూ ఉదయం వాకింగ్ కి వెళ్ళేదాన్ని.అలా వెళ్ళే క్రమం లోనే మొగలి పూలమ్మే ఓ అమ్మాయితో పరిచయమైంది.ఇందిరా పార్క్ లో బోలెడన్ని మొగలి పొదలున్న విషయం చాలా మందికి తెలుసనుకుంటాను.ఆ పిల్లతో సాన్నిహిత్యం పెరిగి సీజన్ లో రోజూ మొగలి పువ్వు కొనేదాన్ని.చాలా సార్లు చల్లటి ఉదయపు వేళ మొగలి సువాసనల్ని మోసుకుంటూ గీత దగ్గరికెళ్ళేదాన్ని.తనకి మొగలి పూలంటే చాలా ఇష్టం.ఆ పూల పిల్ల మీద నేను "మొగలి పూల పిల్ల" అనే కధ కూడా రాసాను.అది నా కధల సంపుటి "ఆమె కల" లొ ఉంది.
ఈ రోజు నేనూ గీత ఆ పార్క్ కి వెళ్ళి చాలా సేపు కూర్చుని బోలెడన్ని కబుర్లు కలబోసుకున్నం.పూలమ్మే అమ్మాయి గుర్తొచ్చింది కాని ఎక్కడా కనబడలేదు.మొగలి పూల మీదకి మనసు మళ్ళింది. పొదల చుట్టూ ప్రదక్షిణ చేసాం కాని ఒక్క పువ్వూ కనబడలేదు.ఎలాగైనా పూలు సంపాదించాలని చిప్స్ అమ్ముకునె అతన్ని అడిగాం మొగలి పూలు దొరుకుతాయా అని.అతను తన బుట్ట మా దగ్గరే పెట్టి ఇప్పుడే వస్తానంటూ వెళ్ళి పూలు కోసే మనిషిని పట్టుకొచ్చాడు.వీళ్ళు కోస్తారని చెప్పి తన బుట్ట తీసుకుని వెళ్ళిపోయాడు.మీరు ఇక్కడే కూర్చోండి మేము పూలు కోసుకొస్తాం అని ఆ పొదల్లో మాయమయ్యారు.ఓ అరగంట తర్వాత గోధుమ రంగు తాచుల్లా మెరుస్తూ సువాసనలు వెదజల్లుతున్న మొగలి పూలతో ప్రత్యక్షమయ్యారు.అప్పటి మా సంతోషాన్ని వెల కట్టలేం కాని వాళ్ళు చెప్పిన వెలకి మా కళ్ళు బైర్లు కమ్మాయి.కేవలం రెండు వందలడిగారు.హమ్మో మరీ అంతా అంటే మీ ఇష్టం మీరు అడిగారనే వెదికి కోసుకొచ్చాం అన్నారు.పువ్వుల్ని వదలాలంపిచడం లేదు.రెండు వందలు చాలా ఎక్కువ.సరే బేరం చేస్తే 100 కిచ్చాడు.
ఆ పువ్వులు మా చేతుల్లోకి వచ్చాక ఆ మత్తు వాసనకి గమ్మత్తుగా చిత్తై పోయాం.
ఆకాశం నిండా కమ్ముకున్న నల్లని మబ్బులు.తుంపర తుంపరగా కురుస్తున్న చిరు జల్లుల్లో నేనూ గీత మొగలిపూల సువాసనల్ని వెదజల్లుకుంటూ కైనటిక్ మీద రయ్ మంటూ దూసుకెళ్ళిపోవడం తో మా ఇందిరా పార్క్ విహార యాత్ర ముగిసింది. మొగలి పూల పిల్ల కనబడలేదు కానీ మొగలి పూలు మాత్రం మా చేతుల్లోకి వచ్చి మా ఇద్దరికి మహదానందం కలిగించాయి.